Kungsi Ki Jenat (Haji Cécé) sobat kuring nétélakeun pareng ditanya dina hiji waktu basa ngawangkong, naon ari harti Ci Leuksa?
Ceuk Ki Jenat ari Leuksa téh tutuwuhan leuweung nu ngareuy nu mungkin waé baheula réya di éta wewengkon nu matak disebut Ci Leuksa, ari CI mah mangrupa kagaliban aran wewengkon di tatar Sunda nu sok maké kecap Ci di hareupna, saperti Ci Beureum, Ci Dadap, Ci Paku jsb, anu nuduhkeun kana harti ka-hiji Ci = Cai, nétélakeun kaayaan wewengkon tatar Sunda nu subur cur cor cai kahuripan, ogé Ci dina harti ka-dua CI = Cahaya, mangrupa hibaran tina Sunda nu mibanda harti SU (alus) Na (Seuneu) Da (agung/gedé).
tapi lian ti éta Ki Jenat kungsi nyebutkeun yén Ci Leuksa ngandung palasifah anu kudu jadi padoman masyarakat Ci Leuksa hususna dina hirup kumbuh sapopoé, nyaéta :
CI = Ciri (karakter), satiap manusa kudu ngabogaan ciri nu mandiri salaku ajén jati diri sacara pribadi.
LEUK = Leukeun (ulet), saperti areuy Leuksa nu terus ngarayap ngaligar akar ngantengkeun areuy néangan puntangan hirup najan kadangkala kudu nyorang taneuh nu tarahal pinuh ku batu, pon kitu deui dina hirup, ulah gampang pegat panghareupan, kudu mibanda sipat militan, daék motékar henteu kendat nya ihtiar.
SA = Sabar tur sadar, sabar dina nyanghareupan rupaning papait nu jadi ujian hirup, turta sadar dina waktu didoja ku dibéré mamanis hirup.
sabab kadangkala réya manusa nu lulus diuji ku kakurangan, ku kapeurih reujeung kasusah
tapi teu saeutik nu ahirna owah pikir waktu didoja ku kaleuwih, ku kangeunah jeung kasenangan hirup.
Paribasa henteu kaop manggih milik, loba harta atawa naék harkat reujeung pangkat, réya anu unggah adat, poho ka wiwitan, lali ka purwa daksina.
Kitu Palasifah Hirup dina aran lembur Ci Leuksa anu harita didadarkeun ku Ki Jenat ka kuring.
"Di kiwari ngancik nu bihari, Seja ayeuna sampeureun jaga"
Sepuh kapungkur mah biasana ngaguarna sok mibanda hakekatna (harti jeung makna) nu jero. Kapan urang oge amun mere ngaran jang budak sok menta bongbolongan heula kanu di pikolot boh Akina, Ninina atawa nu dipikolot, heunteu sakadar copas dinu buku atawa ngaran-ngaran jang nu jadi orok. Komo ieu nami wilayah atawa daerah nu bakal jadi kabuyutan.
-----------------------------------
-----------------------------------
Pengirim tulisan : Aji Guna
إرسال تعليق